الباشا المعايطة: تجار الموت لا رحمة ولا مأوى... والحرب مستمرة حتى تطهير البلد!
جهينة نيوز -الباشا المعايطة: تجار الموت لا رحمة ولا مأوى... والحرب مستمرة حتى تطهير البلد! بقلم نضال انور المجالي خاص الانباط
في هذا الوطن الغالي، الأردن الشامخ، ما في مجال ولا مكان للي بفكر يلعب بأمن أردنا أو يستهدف عقول شبابنا. الرسالة اليوم واضحة وزي عين الشمس، وما فيها أي مجاملة: مدير الأمن العام، عطوفة الباشا عبيد الله المعايطة، واضع خط أحمر، والتعليمات حازمة ومباشرة لكل النشامى باليد الضاربة... "تجار الموت" واللي ببطشوا بمهلكة الكريستال السام مش رايحين يلاقوا في هالأرض الطاهرة لا ملجأ ولا مهرب!
اليوم لما نسمع عن أرقام ومخرجات الحملة الأمنية المشددة، بنعرف إنه في رجال ساهرة ما بتنام. لما الإدارة تتعامل خلال الأسبوع التاسع بس مع 107 قضايا وتلقي القبض على 188 شخص من تجار ومروجين ومتعاطين، وتجيب 56 تاجراً ومروجاً من جحورهم بـ 41 قضية اتجار... هاد دليل قاطع إنه النشامى قاعدين بيدكوا حصون الظلام أولاً بأول.
الرسالة لكل واحد بتسوّل له نفسه يتاجر بأرواح شبابنا: "عين الوطن صاحيتلك، واليد اللي بتمتد بالسموم راح تنقطع بالقانون وبهمة النشامى".
كل الشكر والرفع للجباه.. نشامى المكافحة ومديرها
بهالموقف، من قلوبنا بنرفع العقال وبنحيي نشامى إدارة مكافحة المخدرات، وعلى رأسهم مدير الإدارة وكل الضباط والأفراد والمجموعات الميدانية. هادول الرجال بوقوفهم بالميدان بوجه هالآفة، بقدّموا أرواحهم على أكفّهم بالصف الأول ليظل الأردن بخير وأمان. جهد جبار، وسهر لليل مع النهار، وتخطيط احترافي بيستحق منا كل الشكر والتقدير والإجلال. هادول هم الدرع اللي بحمي أولادنا وبيوتنا من هالسموم القاتلة.
المواطن هو السند والعين الثانية
المعركة هاي معركة بلد كامل، والأمن العام أطلقها صريحة: اتصلوا على (911) وبلّغوا عن أي حركة مشبوهة أو تجارة بهالمادة، والسرية تامة ومكفولة 100%. واجباً علينا كلنا نكون سند للأمن العام ولرجاله النشامى، ونكون كلنا عين ساهرة وباب مقفول بوجه تجار الموت.
راح يظل الأردن عصيّ على كل محاولات الاستهداف، بظل قيادتنا الهاشمية، وبسالة أجهزتنا الأمنية، ووعي نشامى الأردن ونشمياته... وحمى الله الأردن وشعبه الطيب.
تابعو جهينة نيوز على 
